Әл-Фараби мұрасына жаңа көзқарас
Әл-Фараби атындағы ҚазҰУ-да Әбу Насыр әл-Фарабидің туғанына 1155 жыл толуына орай ұйымдастырылған IV халықаралық Фараби форумы басталды.
Дәстүрлі форумның мақсаты – әл-Фарабидің бай мұрасы арқылы қазіргі қоғам дамуының рухани, тарихи және философиялық негіздерін түсіндіру, ойшыл мұрасын зерттеп жүрген отандық және шетелдік ғалымдарды біріктіру, әлемнің жетекші ғалымдары арасындағы диалог пен ынтымақтастықтың жаңа алаңын құру.
Форумға АҚШ, Ресей, Италия, Өзбекстан, Қырғызстан, Түркия, Әзірбайжан, Сирия, Египет және Иран сынды алыс-жақын шетелдерден 100-ден астам ЖОО ғалымдары қатысуда.
«Адамзат тарихындағы әл-Фараби мұрасы» атты халықаралық ғылыми-тәжірибелік конференциядан бастау алған ауқымды шараны ҚазҰУ Басқарма Төрағасының орынбасары – бірінші проректор Еркін Дүйсенов ашты. «Отандық ғалымдардың іргелі зерттеулерінің арқасында Әбу Насыр әл-Фарабидің есімі мәдени символға айналды, ал оның түркі мәдениеті мен руханиятынан бастау алған мұрасы қазақ мәдениеті мен ұлттық мақтанышымыздың қайнар көзі», – деп атап өтті проректор.
Сондай-ақ конференцияның ашылуында Алматы қаласындағы Түркия Республикасы Бас консулдығының білім жөніндегі кеңесшісі Айхан Коркмаз, Сауд Арабиясы Корольдігінің Қазақстан Республикасындағы елшісінің орынбасары Салих Альбедах, Иран Ислам Республикасының Алматыдағы мәдени өкілдігінің директоры Хосейн Агазаде, Сирияның Қазақстандағы құрметті консулы Самих Дерех және басқалар сөз сөйледі.
Пленарлық отырыс аясында философия ғылымының докторы, ҚазҰУ-дың Философия кафедрасының профессоры, Әл-Фараби орталығының ғылыми кеңесшісі Жақыпбек Алтаев, профессор, Рудный университеті гуманитарлық және әлеуметтік ғылымдар факультетінің Философия тарихы кафедрасының меңгерушісі, араб-мұсылман философиясы бойынша маман, Ресей Федерациясының еңбек сіңірген ғылым қайраткері Нұр Кәрібаев, ҚР ҰҒА корреспондент-мүшесі, философия ғылымының докторы, профессор, ҚР БҒМ ҒК Философия, саясаттану және дінтану институтының бас ғылыми қызметкері Наталья Сейтахметова және басқа да белгілі ғалымдар қазіргі фарабитанудың өзекті тақырыптары бойынша баяндама жасады. Конференция жұмысы секциялық отырыстарға жалғасты.
Форум аясында Түрік халықтары философия қоғамы Қазақ комитетінің II мәжілісі, «Фарабитану» жинағының 10 томдығы, Жақыпбек Алтаев пен Қанат Алтынбектің «Жиһангер ғұлама» кітаптарының тұсаукесері, «Аударма өркениетінің феномені: әл-Фараби мен түркі ғалымдарының мұрасы негізінде» атты халықаралық ғылыми конференция, «Әл-Фарабидің философиялық терминологияны қалыптастырудағы рөлі: философия тілі» атты пікірталас алаңы және басқа да іс-шаралар өтеді деп жоспарланған.
Ауқымды шара барысында әл-Фарабидің философиясы мен қазақ халқының рухани мұрасы зерделеніп, руханиятты танудағы дискурстың әртүрлі формалары анықталады. Форум жұмысының қорытындысы бойынша ғылыми материалдар жинағы шығарылады.
Әл-Фараби атындағы ҚазҰУ-дың Баспасөз қызметі
