ҚазҰУ мен Гонконг қалалық университеті арасындағы кездесу өтті: халықаралық ынтымақтастық пен тұрақты даму – басты назарда. ТДМ 4 және ТДМ 17

2025 жылғы 15 сәуірде әл-Фараби атындағы Қазақ ұлттық университетінің физика-техникалық факультетінде Гонконг қалалық университеті (City University of Hong Kong) делегациясымен ресми кездесу өтті. Шара 301-кабинетте өтіп, профессор-оқытушылар құрамы, ғылыми бөлімдер мен студенттер қатысты.

Кездесудің модераторы – физика-техникалық факультеттің деканы Бейсен Нұрзада Әбдібекқызы, ол БҰҰ-ның Тұрақты даму мақсаттары (ТДМ), атап айтқанда ТДМ 4 (Сапалы білім) және ТДМ 17 (Тұрақты даму үшін серіктестік) аясында халықаралық академиялық байланыстарды кеңейтудің маңыздылығын атап өтті.

CityU Жаратылыстану факультетінің деканы профессор Син Ван құттықтау сөз сөйлеп, ҚазҰУ-дың ғылыми және академиялық әлеуетіне жоғары баға беріп, тұрақты ғылыми-білім беру серіктестігін дамытуға дайын екенін жеткізді.

Кездесу барысында бірлескен жобаларды БҰҰ-ның халықаралық бағдарламалары мен «жасыл» технологиялар, цифрландыру және тұрақты энергетика салаларындағы бастамаларға енгізу мүмкіндіктері талқыланды. Кездесу қорытындысы бойынша тараптар өзара түсіністік туралы Меморандумға қол қоюға және 2025–2026 оқу жылында бірлескен білім беру және ғылыми бағдарламаларды іске асыруға дайын екендерін растады.