Ғылыми-тәжірибелік конференция: «Болашақ медицинасы»

2025 жылдың 16 сәуірінде әл-Фараби атындағы ҚазҰУ медицина және денсаулық сақтау факультетінің жалпы дәрігерлік тәжірибе кафедрасында гибридті форматта «Болашақ медицинасы» тақырыбында ғылыми-тәжірибелік конференция өтті.

Іс-шара қазіргі медицинаның даму бағыттарын талқылау мақсатында денсаулық сақтау, ғылым, білім беру және жоғары технологиялар саласындағы мамандарды жинады.

Конференция ғылым жетістіктерімен, тәжірибемен және ауруларды диагностикалау, емдеу мен алдын алудың инновациялық тәсілдерімен алмасу алаңына айналды. Бағдарлама аясында денсаулық сақтау жүйесіне сандық технологияларды енгізу, жасанды интеллектті қолдану, телемедицинаны дамыту, пациентке жекелей көзқарас, сондай-ақ инновациялық медицинаның этикалық және құқықтық аспектілері қарастырылды. Сонымен қатар, аурулар қаупін жеке болжауға, ауруларды ерте анықтауға, ем тиімділігі мен нәтижелерін бағалауға және жаңа дәрілік заттарды әзірлеуге арналған биологиялық маркерлер мәселелері де талқыланды.

Конференцияда отандық және шетелдік жетекші ғалымдар, барлық бейіндегі тәжірибелі дәрігерлер, медициналық жоғары оқу орындарының оқытушылары мен білім алушылары (докторанттар, магистранттар, интерндер мен жоғары курс студенттері), сондай-ақ ғылыми-зерттеу және білім беру мекемелерінің өкілдері баяндама жасады.

Қатысушылар өз зерттеу нәтижелерін, клиникалық жағдайларды және медициналық көмектің тиімділігі мен қолжетімділігін арттыруға бағытталған жобаларды ұсынды.

Іс-шара қорытындысы бойынша қатысушылар көтерілген тақырыптардың өзектілігін атап өтіп, мұндай кездесулер денсаулық сақтау жүйесіне инновацияларды жедел енгізуге ықпал ететініне сенім білдірді. Ұйымдастырушылар конференцияның жоғары деңгейде өткенін және қатысушылар тарапынан зор қызығушылық туғызғанын атап өтіп, бұл кездесудің болашақ медицина жөніндегі жаһандық диалогты қалыптастырудағы маңызды қадам болғанын айтты.

Баяндамашылар жоғары кәсіби деңгейдегі баяндамалары, өзекті ғылыми зерттеулері және медициналық ғылымды дамытуға белсенді қатысқандары үшін алғыс хаттармен және құрмет грамоталарымен марапатталды.