ҚАЗҰУ МЕН ЭКОЛОГИЯ ЖӘНЕ ТАБИҒИ РЕСУРСТАР МИНИСТРЛІГІ ЖОЛ КАРТАСЫН ӘЗІРЛЕДІ

Әл-Фараби атындағы ҚазҰУ-да ҚР Экология және табиғи ресурстар министрлігі өкілдері мен университет басшылығы және ғылыми қауымдастығы арасында кездесу өтті. Келіссөздер барысында ҚазҰУ-дың Басқарма мүшесі – ғылыми-инновациялық қызмет жөніндегі проректор Марғұлан Ибраимов университеттің ғылыми-инновациялық орталықтары мен зертханаларының қызметі мен әлеуеті туралы баяндады.

Экология және табиғи ресурстар вице-министрі Нұрлан Құрмалаев өз сөзінде министрлік пен университет арасындағы өзара іс-қимылдың маңыздылығы мен өзектілігін атап өтті. «ҚазҰУ-дың суперкомпьютерлік технологиялары мен Жерді қашықтықтан зондтау (ЖҚЗ) деректерін пайдалану арқылы табиғи үдерістерді тиімді болжауға және қоршаған ортаның жай-күйін бақылауға мүмкіндік аламыз. ҚазҰУ-мен әріптестік – елімізде экологиялық қауіпсіз шешімдерді дамытудағы маңызды қадам», – деді вице-министр Н.Құрмалаев.

Ол сондай-ақ ынтымақтастықтың негізгі бағыттарына тоқталып өтті. Атап айтқанда ЖҚЗ деректерін қолдана отырып, атмосфералық ауаның жай-күйін, орман экожүйелері мен биологиялық алуантүрлілікті бақылау мәселелері қозғалды. Эколог мамандардың пікірінше, экологиялық тұрғыдан қауіпсіз технологияларды дамыту аса маңызды, бұл – ұлттық және халықаралық деңгейде инновацияларды ілгерілетуге бағытталған «Жасыл технологиялар» тізілімінің бір бөлігі. Бұған қоса, ғылыми-техникалық әріптестік аясында тұрмыстық қатты қалдықтар полигондары мен заңсыз қоқыс үйінділерін анықтап, бақылау жүргізу жоспарланған. Бұл шаралардың мақсаты – ластану көздерін жедел анықтап, оны жоюға және алдын алуға бағытталған нақты шешімдер қабылдау.

Кездесу аясында Орман шаруашылығы комитеті, Экологиялық реттеу комитеті, сондай-ақ бірқатар ғылыми-зерттеу институттары мен мемлекеттік мекемелермен ықтимал өзара іс-қимыл мәселелері талқыланды. Арал теңізінің тартылған түбін зерттеу және сексеуіл егу арқылы экожүйені қалпына келтіру бойынша бірлескен зерттеулердің болашағына ерекше назар аударылды.

Іс-шара барысында делегация университеттің ғылыми-инновациялық құрылымдарымен – FARABI HUB, Робототехника және мехатроника құзыреттер орталығы, Тұрақты даму және табиғатты ұтымды пайдалану ғылыми орталығы, Қытай-Қазақстан ЖҚЗ зертханасы, суперкомпьютерлік кластер, Инжиниринг және ғылымды қажет ететін технологиялар кластері және Farabi Chem орталығының жұмысымен танысты.

Кездесу соңында география және табиғатты пайдалану, биология және биотехнология, химия және химиялық технология факультеттерінде бағыттар бойынша секциялық сессиялар өтті. Нәтижесінде ҚазҰУ мен Экология және табиғи ресурстар министрлігі арасындағы ынтымақтастықты нығайту және дамытуға арналған жол картасы әзірленді.

Әл-Фараби атындағы ҚазҰУ-дың Баспасөз қызметі