Huawei ICT Competition 2025–2026 роуд-шоуы ҚазҰУ-да өтті. ТДМ 4 және ТДМ 9

2025 жылғы 9 қыркүйекте әл-Фараби атындағы Қазақ ұлттық университетінде халықаралық Huawei ICT Competition 2025–2026 байқауының дәстүрлі роуд-шоуы өтті. Іс-шара механика-математика факультетінің Қызыл залында ұйымдастырылып, студенттер мен оқытушылардың басын қосты.

Кездесу барысында Huawei Technologies Kazakhstan және ҚазҰУ жанындағы Huawei академиясының өкілдері байқаудың негізгі бағыттары, қатысу ережелері мен жас мамандар үшін ашылатын кәсіби мүмкіндіктер туралы жан-жақты ақпарат ұсынды. Қатысушыларға жарыстың негізгі салалары таныстырылды: желілік технологиялар, бұлтты сервистер мен есептеу жүйелері, бағдарламалау және инновациялар.

Байқаудың халықаралық ауқымы

Huawei ICT Competition — ақпараттық-коммуникациялық технологиялар саласындағы ең ірі халықаралық білім беру бастамаларының бірі:

• жыл сайын оған әлемнің 100-ден астам елінен 960 000-нан астам студент қатысады;

• қазақстандық командалар үнемі жоғары нәтиже көрсетіп, ғаламдық финалға шығып, жүлделі орындарға ие болуда.

Студенттер мен оқытушылар үшін маңызы

Студенттер үшін байқауға қатысу заманауи цифрлық білімге, Huawei халықаралық сертификаттарына қол жеткізуге және табысты IT-мансап құруға жол ашады. Ал оқытушылар үшін бұл іс-шара тәжірибе алмасу мен жаһандық цифрлық экожүйенің даму үрдістерімен танысу алаңы болды.

Тұрақты даму мақсаттарына қосқан үлесі

Huawei ICT Competition ҚазҰУ-да өткізілуі ТДМ 4 «Сапалы білім беру» мақсатына сәйкес студенттердің заманауи цифрлық білім мен дағдыларға қол жеткізуін кеңейтеді, сондай-ақ ТДМ 9 «Индустрияландыру, инновациялар және инфрақұрылым» мақсатына сай тұрақты цифрлық инфрақұрылымды дамытуға және инновациялық қызметті ынталандыруға ықпал етеді.

Осылайша, университет бәсекеге қабілетті кадрларды даярлауда ұлттық көшбасшы ретіндегі ұстанымын нығайтып қана қоймай, халықаралық академиялық және технологиялық ынтымақтастықтың белсенді қатысушысына айналуда.