A*STAR және Наньян технологиялық университеті делегациясының ҚазҰУ физика-техникалық факультетімен кездесуі. ТДМ 9 және ТДМ 17

2025 жылғы 19 қыркүйекте әл-Фараби атындағы Қазақ ұлттық университетінің физика-техникалық факультетінде Сингапурдың Ғылым, технологиялар және зерттеулер агенттігі (A*STAR) және Наньян технологиялық университетінің (NTU) делегациясымен кездесу өтті.

Іс-шара факультет деканы Нурзада Абдибековна Бейсеннің төрағалығымен өтіп, факультет басшылығын, кафедра меңгерушілерін және докторанттарды біріктірді. Қос тараптан құттықтау сөздерін факультет деканы және Энди Хор, A*STAR зерттеулер жөніндегі бас директорының орынбасары айтты. Кездесу барысында ғылыми қызметтің негізгі бағыттары мен сапардың мақсаттары таныстырылды.

Негізгі назар жартылай өткізгіштер, нанотехнологиялар, тұрақты даму және болашақ энергетика салаларындағы ынтымақтастықты дамыту мәселелеріне аударылды. Қатысушылар бірлескен ғылыми жобаларды жүзеге асыру, академиялық ұтқырлықты кеңейту және ҚазҰУ мен Сингапурдың жетекші ғылыми орталықтары арасындағы екіжақты байланыстарды нығайту перспективаларын талқылады.

Тұрақты даму мақсаттарына (ТДМ) қосқан үлес:

• ТДМ 9. Индустрия, инновациялар және инфрақұрылым — халықаралық ынтымақтастық аясында ғылыми-техникалық әлеуетті дамыту және озық технологияларды енгізу.

• ТДМ 17. Тұрақты даму мүддесіндегі әріптестік — халықаралық байланыстарды кеңейту және ғылым мен білім саласындағы екіжақты өзара іс-қимылды тереңдету.

Кездесуде жас зерттеушілердің (PhD қорғағаннан кейін 7 жылға дейінгі Early-Career Researchers) A*STAR ғылыми алмасу бағдарламаларына қатысу мүмкіндіктеріне ерекше назар аударылды. Бағдарлама шетелдік институттарда 3–6 айлық тағылымдамаларды қарастырады және жол жүру, тұру және басқа да шығындарды толық өтейді.

Мұндай алмасулар жас ғалымдардың кәсіби өсуіне, жаһандық ғылыми ынтымақтастыққа тартылуына ықпал етіп қана қоймай, сонымен қатар бірлескен ғылыми жобаларды әзірлеуге, ынтымақтастық туралы меморандумдарға (MOU) қол қоюға және халықаралық гранттарға өтінімдер дайындауға әкеледі деп күтілуде.