ҚазҰУ-дың физика-техникалық факультетінде «Интеллект формуласы» атты зияткерлік турнир өтті. ТДМ 4 және ТДМ 17

Әл-Фараби атындағы Қазақ ұлттық университетінің физика-техникалық факультетінде мектеп оқушылары арасында әйгілі «Не? Қайда? Қашан?» бағдарламасы үлгісінде ұйымдастырылған «Интеллект формуласы» атты зияткерлік турнир өткізілді.

Іс-шараны Атом энергиясы жөніндегі ақпараттық орталықтар «Росатом» мемлекеттік корпорациясының және Қазақстан ядролық қоғамы жастар қанатының қолдауымен ұйымдастырды. Турнирдің мақсаты – өскелең ұрпақтың ғылымға, инженерлік ойлауға және командалық жұмысқа деген қызығушылығын дамыту.

Зияткерлік додаға Алматы қаласының бірнеше мектебі – «Лика» гимназиясы, №134 лицейі және Lake View School Almaty қатысты. Оқушылар физика мен химиядан бастап тарих пен өнерге дейінгі түрлі салалар бойынша сұрақтарға жауап бере отырып, өздерінің білімін, тапқырлығын және логикалық ойлау қабілетін көрсетті.

Қорытындысында қатысушылар мұндай шаралар интеллектуалдық қабілеттерді дамытып қана қоймай, өзара түсіністік пен серіктестік дағдыларын қалыптастыратынын атап өтті.

«Интеллект формуласы» турнирінің физика-техникалық факультет базасында өткізілуі БҰҰ-ның Тұрақты даму мақсаттарына қол жеткізуге ықпал етеді, атап айтқанда:

• ТДМ 4 – Сапалы білім беру: жастар арасында ғылыми танымды және сыни ойлауды дамыту арқылы;

• ТДМ 17 – Тұрақты дамуға арналған әріптестік: Қазақстан мен Ресейдің білім беру және ғылыми ұйымдарының ынтымақтастығы арқылы жүзеге асырылады.