«25 ҚАЗАН – РЕСПУБЛИКА КҮНІ» АТТЫ МЕРЕКЕЛІК ІС-ШАРА

Тұрақты даму мақсаттары аясында 2025 жылғы 23 қазанда Әл-Фараби атындағы Қазақ ұлттық университеті Шығыстану факультетінде Түріктану және Шығыс елдері тарихы кафедрасының ұйымдастыруымен «25 қазан – Республика күні» атты мерекелік іс-шара өтті. Дөңгелек үстел форматында өткен іс-шараға кафедра оқытушылары мен 3-4 курс студенттері белсене қатысты.

Шараның негізгі мақсаты – Қазақстан Республикасының мемлекеттілігін дәріптеу, егемендік пен тәуелсіздіктің маңызын терең түсіндіру, сондай-ақ жастардың отансүйгіштік сезімін қалыптастыру және патриоттық рухын арттыру болды.

Бағдарлама барысында студенттер «Қазақстан мен Түркияның ұлттық жаңғыру көшбасшылары» тақырыбында мазмұнды презентация дайындап, екі ел арасындағы тарихи байланыстар мен ортақ құндылықтарды кеңінен талқылады. Сонымен қатар «Қазақстан мен Түркияның достығы» атты бейнеролик көрсетіліп, көрермендерге бауырлас елдердің өзара ынтымақтастығы мен мәдени байланыстары жөнінде әсерлі көріністер ұсынылды.

Іс-шарада студенттер «Отан туралы» поэзиялық композиция орындап, елге деген сүйіспеншіліктерін көркем сөз арқылы жеткізді. Бұдан бөлек, Республикалық мерекеге арналған танымдық викторина ұйымдастырылып, қатысушылар өз білімдерін сынап, қызықты сұрақтарға жауап берді.

Мереке соңында барлық қатысушылар «Көк тудың желбірегені» әнін бірге орындап, жиынға ерекше рух пен көтеріңкі көңіл-күй сыйлады. Іс-шара жоғары деңгейде өтіп, студенттерге ел тәуелсіздігінің қадірін ұғындырып, мемлекетшілдік пен бірлік идеяларын насихаттауға үлкен үлес қосты.

Ұйымдастырушылар: 3-4 курс  куратор-эдвайзерлері Г.К.Теменова, А.Ж.Назарова