Әзербайжан Республикасының Ғылым академиясының корреспондент-мүшесі, профессор Аловсат Гулиев Әзербайжан топырақтарының жағдайы туралы көшбасшылық дәріс оқыды

2025 жылдың 6 қарашасында әл-Фараби атындағы Қазақ ұлттық университетінің География және табиғатты пайдалану факультетінде өткен «Орталық Азия биоалуантүрлілігін сақтау мәселелері мен перспективалары» атты Халықаралық ғылыми-тәжірибелік конференция аясында Әзербайжан Республикасының Ғылым академиясының корреспондент-мүшесі, профессор Аловсат Гулиев лидерлік дәріс оқыды.

«КСРО ыдырағаннан кейінгі Әзербайжан топырақтарының экомелиоративтік жағдайы және оны реттеу жолдары» тақырыбындағы дәріс «Экология» және «Гидрология» білім беру бағдарламаларының студенттеріне арналды. Өз баяндамасында профессор Гулиев Әзербайжан топырақтарының қазіргі жағдайына талдау жасап, посткеңестік кезеңде пайда болған экологиялық мәселелерге тоқталды.

Ғалым атап өткендей, ең өзекті экологиялық қатерлердің бірі — суармалы жерлердің деградациясы, ол қайталама тұздану, батпақтану және шөлейттену түрінде байқалады. Бұл процестердің негізгі себептері – суды ұтымсыз пайдалану, суару жүйелерінің тозуы және заманауи мониторинг жүйесінің болмауы.

Дәрісте қозғалған мәселелер БҰҰ-ның Тұрақты даму мақсаттарымен (ТДМ) тікелей байланысты:
• 2-мақсат – Аштықты жою: жер құнарлылығын қалпына келтіру және өнімділікті арттыру;
• 6-мақсат – Таза су және санитария: суды ұтымды пайдалану және су ресурстарының деградациясының алдын алу;
• 15-мақсат – Құрлық экожүйелерін сақтау: шөлейттену мен топырақ деградациясының алдын алу және жерлерді қалпына келтіру.

Профессор Аловсат Гулиевтің дәрісі ауыл шаруашылығының тұрақты дамуы, экологиялық қауіпсіздікті қамтамасыз ету және халықтың әл-ауқатын арттыру үшін стратегиялық маңызға ие. Дәріс студенттер мен оқытушылардың үлкен қызығушылығын тудырып, экология және табиғатты пайдалану саласындағы халықаралық ғылыми ынтымақтастық пен тәжірибе алмасудың жарқын үлгісі болды.

Тұрақты даму бойынша ЮНЕСКО кафедрасы мен География және табиғатты пайдалану факультеті профессор Аловсат Гулиевке мазмұнды әрі өзекті дәрісі үшін шынайы алғыс білдіреді. Бұл дәріс халықаралық ғылыми диалогты дамытуға және болашақ мамандардың экологиялық дүниетанымын қалыптастыруға зор үлес қосты.