Әл-Фараби атындағы Қазақ ұлттық университетінің физика-техникалық факультетінде IPR SMART платформасы бойынша оқыту семинары өтті (ТДМ 4 және ТДМ 9).

2025 жылғы 6 қараша күні Әл-Фараби атындағы Қазақ ұлттық университетінің физика-техникалық факультетінде «EDP Hub» баспасының ұйымдастыруымен және Сейт Анарханның қатысуымен IPR SMART платформасы бойынша оқыту семинары өтті.

Іс-шараның мақсаты – оқытушылар мен студенттерді заманауи IPR SMART білім беру ресурсының мүмкіндіктерімен таныстыру. Бұл платформа оқу, ғылыми, әдістемелік және мерзімді басылымдардың 100 мыңнан астам атауына электронды форматта қол жеткізуге мүмкіндік береді. IPR SMART жүйесі оқу және ғылыми зерттеу үдерістерін цифрландыруға, іздеу, оқу және материалдармен тиімді жұмыс істеуге жағдай жасайды.

Семинар барысында қатысушылар:

• университет арқылы IPR SMART жүйесіне қол жеткізу жолдарын;

• іздеу мен жеке кабинет функцияларын пайдалану тәсілдерін;

• платформаны оқу және ғылыми жұмыстарда тиімді қолдану жолдарын меңгерді.

Мұндай іс-шаралар оқытушылар мен студенттердің цифрлық құзыреттілігін арттыруға, академиялық ұтқырлықты дамытуға және білімге ашық қолжетімділікті кеңейтуге ықпал етеді.

Семинар БҰҰ-ның Тұрақты даму мақсаттарының №4 «Сапалы білім беру» және №9 «Индустрияландыру, инновациялар және инфрақұрылым» қағидаттарына сәйкес өткізіліп, заманауи білім беру ортасын қалыптастыру мен ғылыми зерттеулерді қолдауға бағытталды.