ҚазҰУ-да жалпыуниверситеттік сенбілік өткізілді. ТДМ 15 – Жер экожүйелерін қорғау

Әл-Фараби атындағы Қазақ ұлттық университетінде дәстүрлі жалпыуниверситеттік сенбілік ұйымдастырылды. Іс-шараның негізгі мақсаты – кампус аумағын абаттандыру, экологиялық мәдениетті дамыту және студенттерді қоғамдық жұмыстарға белсенді тарту. Сенбілікке Плазма физикасы, нанотехнология және компьютерлік физика кафедрасының аға оқытушылары Кенжебекова А.И. мен Амренова А.У. жетекшілік етті. Олар «6B07107 Электр энергетикасы» білім беру бағдарламасының 2–3 курс студенттерімен бірге университет аумағын тазалау, жасыл аймақтарды күтіп-баптау және көгалдандыру жұмыстарына атсалысты. Студенттер мен оқытушылар бірлесіп жиналған қоқыстарды шығарып, ағаштар мен көгалдарды күтуді орындап, оқу ғимараттары маңындағы аумақтың тазалығын қамтамасыз етті. Шара жастардың экологиялық жауапкершілігін арттыруға, ұжымдық рухты нығайтуға және университеттің таза, жайлы ортасын қалыптастыруға бағытталды. Сенбілік жоғары деңгейде ұйымдастырылып, қатысушылар белсенділік танытты. Мұндай іс-шаралар ҚазҰУ-дың экологиялық мәдениетті дамытуға және студенттердің әлеуметтік жауапкершілігін арттыруға бағытталған тұрақты жұмыстардың бір бөлігі болып табылады.