СПОРТ – ДЕНСАУЛЫҚ КЕПІЛІ: ҚАЗҰУ СТУДЕНТТЕРІ САЛАУАТТЫ ӨМІР САЛТЫН НАСИХАТТАДЫ

2025 жылғы 14 қарашада Әл-Фараби атындағы Қазақ ұлттық университеті Шығыстану факультеті Түріктану және Шығыс елдері тарихы кафедрасының 2 курс студенттері Тұрақты даму бағдарламасы аясында «Спорт – денсаулық кепілі» атты челлендж өткізді. Шараның негізгі мақсаты – жастардың білім алу процесімен қатар дене тәрбиесін нығайтуға назар аудару, салауатты өмір салтын кеңінен насихаттау және студенттердің әлеуметтік белсенділігін арттыру.

Челлендж барысында студенттер спорттық жаттығуларды орындап, өздерінің жеке белсенді үлгілерін көрсетті. Олар күнделікті өмірде дене қозғалысын көбейтудің, спортты әдетке айналдырудың және уақытты тиімді пайдаланудың маңызын атап өтті. Іс-шара әлеуметтік желіде де кеңінен таралып, басқа топтар мен факультеттерге үлгі боларлық бастамаға айналды.

Студенттердің айтуынша, тән саулығы – тұлғаның жан-жақты дамуының негізгі шарты. Денсаулығы мықты жас ұрпақ білім алу мен кәсіби қалыптасуда жоғары нәтиже көрсетіп қана қоймай, қоғамдағы түрлі еңбек жағдайларына оңай бейімделеді. Сондықтан спортпен айналысу – жастардың интеллектуалдық, эмоционалдық және әлеуметтік әлеуетін күшейтетін маңызды фактор.

Бұл челлендж Тұрақты даму мақсаттарының (TDМ) мынадай бірнеше бағытын қамтиды:

• TDМ 3: «Денсаулық және бақуаттылық» – жастардың денсаулығын нығайту, созылмалы аурулардың алдын алу;
• TDМ 4: «Сапалы білім» – дене тәрбиесі мен білімді ұштастыру;
• TDМ 11: «Тұрақты қалалар мен қауымдастықтар» – қоғамда белсенді және салуатты орта қалыптастыру.

Шара аталған бағыттарды жүзеге асыруға студенттердің өз үлесін қосып жатқанын байқатады. Бұл – университет қабырғасындағы білім берудің академиялық қана емес, сонымен қатар рухани-адамгершілік және дене тәрбиесі тұрғысынан да дамып жатқанын көрсетеді. ҚазҰУ-дың жас түріктанушылары ұйымдастырған «Спорт – денсаулық кепілі» челленджі университет ішінде салауатты мәдениетті нығайтудың және жастарды белсенді өмір сүруге шақырудың тиімді үлгісіне айналды. Мұндай бастамалар болашақ мамандардың жан-жақты қалыптасуына ықпал етіп, университеттің білім беру миссиясын жаңа деңгейге көтереді.

А.Т. Кыркымбекова