ҰСТАЗ ШЕБЕРЛІГІ – ЖАС ЗЕРТТЕУШІНІҢ ҒЫЛЫМ ЖОЛЫНДАҒЫ ШАМШЫРАҒЫ
БІЛІМДІДЕН ШЫҚҚАН СӨЗ ТАЛАПТЫҒА БОЛСЫН КЕЗ...
Тілші ғалым Сүйерқұл Ботагөз Мырзабайқызы ғылыми-әдістемелік семинар өткізді
2025 жылғы 14 қарашада Әл-Фараби атындағы Қазақ ұлттық университеті Шығыстану факультетінде Түріктану және Шығыс елдерінің тарихы кафедрасының зерттеуші-доценті, филология ғылымдарының докторы Сүйерқұл Ботагөз Мырзабайқызының ұйымдастыруымен «Диссертация жазуда және ресімдеуде жиі кездесетін қателер» атты мазмұны терең, пәрменді ғылыми семинар өтті.
Бұл ғылыми іс-шараға факультеттің жас ғалымдары, докторанттар және тәжірибелі оқытушылар қатысты. Семинардың мазмұны, жүргізілу формасы, талқылау деңгейі докторанттарға ерекше әсер қалдырды. Оларға диссертация тақырыбын дұрыс таңдаудан бастап, материал жинау, дереккөздермен сауатты жұмыс істеу, зерттеу жүргізу, ғылыми стильді қолдану, еңбекті рәсімдеу барысында жиі жіберілетін қателер мен оларды болдырмаудың нақты жолдары жан-жақты түсіндірілді.
Ботагөз Мырзабайқызы ғылыми материалдарды жинақтау әдістерін, зерттеу тақырыбын терең зерделеу жолдарын, аналитикалық қабілеттерді дамыту тәсілдері жайында егжей-тегжейлі баяндап берді. Сонымен қатар:
- уақыт менеджментінің маңызы;
- диссертацияны белгіленген мерзімде аяқтау стратегиялары;
- ғылыми этика талаптары;
- ашықтық пен шынайылық қағидаттары;
- жас ғалымның тұлғалық дамуы сияқты мәселелер де кеңінен талқыланды.
Ғылыми еңбекті құрылымдық, стильдік жағынан дұрыс жазуға қажетті кәсіби кеңестер ұсынылған семинарда Ботагөз Мырзабайқызының ұстаздық қабілетінің жаңа қыры жарқырай көрінді. Ол жастарға тек ғылыми ақпарат қана емес, зерттеушілік мәдениеттің мәнін түсіндіріп, ғылым жолындағы еңбек пен табандылықтың маңызын ерекше атап көрсетті. Осындай ғылыми ізденіс тәсілдерін үйрету арқылы еліміздегі ғылым саласының дамуына үлес қосатын жаңа буын ғалымдарын әзірлеу – мемлекетіміздің озық елдер қатарына қадам басуына берік негіз болары сөзсіз. 
Cеминар соңында докторанттар өздерін қызықтырған сұрақтарын қойып, нақты әрі түсінікті жауаптар алды. Бұл диалог ғылыми пікір алмасуды күшейтіп қана қоймай, жас ғалымдардың алдағы зерттеулеріне сенімділік берді. Ботагөз Мырзабайқызы ғылыми ізденістердің сындарлы кезеңдерінде дұрыс жол таңдай білу қажеттігін, уақытты тиімді жоспарлау – табысты зерттеудің негізгі шарты екенін ерекше атады.
Бұл ғылыми семинар Шығыстану факультетінің жас зерттеушілері үшін кәсіби шеберлікті арттыратын, ғылыми мәдениетті қалыптастыратын маңызды баспалдақ болды. Білікті маманның тәжірибесін, әдіскерлігі мен ұстаздық шеберлігін жас ғалымдардың ғылыми ортада өз орнын табуына бағыт-бағдар беретін құнды ресурс ретінде бағалауға болады.
Ботагөз Мырзабайқызының терең білімін, әдістемелік шеберлігін, ұстаздық парасатын айқын танытқан бұл кездесуде қатысушылар шынайы ғылыми мектептің үлгісін көрді. Осындай жоғары деңгейдегі ғылыми іс-шаралар елімізде ғылым дамуына серпін беріп, бәсекеге қабілетті ғалымдардың жаңа буыны қалыптасуына игі ықпал ететіні анық.
Басқа жаңалықтар
