ҚазҰУ-дың география және табиғатты пайдалану факультетінде Тәуелсіздік күніне арналған тағылымды тәрбиелік іс-шара өтті. Аталған шара БҰҰ Тұрақты даму мақсаттарының 17-ші бағыты – «Бейбітшілік, әділдік және тиімді институттар» бағдарламасы аясында ұйымдастырылды.
Жиын гидрология, туризм және география білім беру бағдарламаларының білім алушылары арасында өтті. Шараның негізгі мақсаты – студент жастардың отансүйгіштік рухын нығайту, ел тарихына, ұлттық құндылықтарға деген құрметін арттыру, сондай-ақ азаматтық жауапкершілік, әділдік пен қоғамдық келісім құндылықтарын дәріптеу болды.
Іс-шара «Менің жүрегім – Қазақстан» тақырыбында өтіп, студенттер арасында қабырға суретін салу арқылы елге деген сүйіспеншілікті көркем-шығармашылық тұрғыда жеткізу формасында ұйымдастырылды. Тәрбиелік бағдарламаны тарих факультетінің Қазақстан тарихы кафедрасының қауымдастырылған профессоры, т.ғ.д. Гүлжазира Естайқызы мен оқытушы Жұлдыз Бекбауова жоғары деңгейде ұйымдастырды.
Басқосуға география және табиғатты пайдалану факультеті деканының оқу-әдістемелік және тәрбие жұмысы жөніндегі орынбасары Айман Шәкенқызы қатысып, жастар арасында бейбітшілік, әділдік, заң үстемдігі мен қоғамдық жауапкершілік қағидаттарын қалыптастырудағы мұндай іс-шаралардың маңыздылығын атап өтті.
Кеш барысында студенттер домбырамен күй тартып, «Желтоқсан желі» әнін шырқады. Бұл көріністер 1986 жылғы Желтоқсан оқиғасының тарихи тағылымын терең сезінуге мүмкіндік беріп, тәуелсіздік жолындағы күрестің рухани құндылығын айқын көрсетті.
Аталған іс-шара студенттердің шығармашылық әлеуетін арттырып қана қоймай, олардың ұлттық сана-сезімін қалыптастыруға, азаматтық ұстанымын нығайтуға, сондай-ақ БҰҰ-ның Тұрақты даму мақсаттарына сай бейбіт қоғам құру идеяларын насихаттауға зор үлес қосты.
Мейрамгүл БИЖАНОВА,
Қазақстан тарихы кафедрасының
аға оқытушысы
Басқа жаңалықтар
