«EcoEnergy Hackathon» зияткерлік инновациялық сайысы

2026 жылы Филология факультетінде 25 ақпан күні БҰҰ-ның 2030 жылға дейінгі Тұрақты даму бағдарламасын жүзеге асыру мақсатында «EcoEnergy Hackathon» атты ауқымды зияткерлік сайыс өтті. Шараның негізгі мақсаты — студенттердің назарын ТДМ 7: «Қолжетімді және таза энергия» мәселелеріне аудару және оларды экологиялық мәселелердің практикалық шешімдерін іздеуге тарту.

  Бағдарламаның алғашқы бөлімінде тұрақты дамудың маңызы мен тарихы талқыланды. Студенттер «Our Common Future» (1987 ж.) баяндамасында негізі қаланған тұрақты даму ұғымымен танысып, қазіргі ұрпақ қажеттілігін болашаққа зиян келтірмей қанағаттандыру принциптерін талдады. Энергияның заманауи қоғамдағы рөлі — ауруханалардың, университеттердің және цифрлық технологиялардың үздіксіз жұмыс істеуінің негізгі факторы екені ерекше атап өтілді. Сондай-ақ, әлемдегі энергетикалық дағдарыс, қазба отынына тәуелділік және климаттың өзгеруі сияқты өзекті мәселелер қарастырылды.

   Хакатонның практикалық бөлімінде студенттер «Университетте энергия тиімділігін қалай арттыруға болады?» деген тақырыпта жобалық жұмыстар жүргізді. Командалар университет аудиториялары мен ғимараттарындағы энергия шығындарын (жарықтың артық жануы, жылу шығыны) анықтап, оларды оңтайландырудың жолдарын ұсынды. Атап айтқанда:

- LED шамдарға толық көшу және сенсорлы жарық жүйелерін орнату;

- Университет шатырларына күн панельдерін қою арқылы баламалы энергияны пайдалану;

- Студенттер арасында энергия үнемдеу мәдениетін қалыптастыру бойынша цифрлық шешімдер әзірлеу.

    Қатысушылар жобаның жүзеге асу мерзімін, жауапты тұлғаларды және күтілетін экономикалық тиімділікті есептеп шықты. Бұл хакатон студенттердің тек білім алып қана қоймай, қоғамдағы оң өзгерістердің агенті бола алатынын дәлелдеді.

    Ұйымдастырушылар: Түркітану және тіл теориясы кафедрасы аға оқытушысы Несіпбай Гульдана және «6В01706 Шетел тілі: екі шетел тілі» мамандығының 3-курс студенттері.