Болашақ заңгерлерге арналған ҚазҰУ заң клиникасының шеберлік сабағы
2026 жылғы 4 қарашада Ілияс Жансүгіров атындағы Жетісу университетінде (Талдықорған қ.) студенттік заң клиникасының өкілі, әл-Фараби атындағы Қазақ ұлттық университетінің кеден, қаржы және экологиялық құқық кафедрасының аға оқытушысы, Tasta орталығының негізін қалаушы Данияр Саттарұлы Әбдірахманов студенттерге шеберлік сабағын өткізді.
Ол БҰҰ-ның Тұрақты даму мақсаттары (ТДМ) контекстінде салауатты өмір салтының маңызы туралы баяндады. Сондай-ақ студенттерге ҚазҰУ Заң клиникасының жұмыс тәртібі, оның мақсаттары мен тегін заң көмегін көрсету бағыттары таныстырылды.
Кездесу еркін диалог форматында өтті: студенттер талқылауға белсенді қатысып, клиника жұмысына қатысты сұрақтар қойды. Мұндай бастамалар жоғары оқу орындары арасындағы ынтымақтастықты нығайтып, жастардың құқықтық мәдениетін арттырып қана қоймай, болашақ заңгерлерге бағалы тәжірибелік дағдылар алуға мүмкіндік береді.
