Техникалық білім берудегі инновациялар: оқытудың заманауи әдістері
Техникалық білім берудегі инновациялар: ҚазҰУ физика-техникалық факультетінде оқытудың заманауи әдістері талқыланды
Әл-Фараби атындағы Қазақ ұлттық университетінің физика-техникалық факультетінде «Техникалық университеттегі оқытудың инновациялық әдістері» тақырыбында білім беру семинары өтті. Іс-шараны Жылуфизика және техникалық физика кафедрасының қауымдастырылған профессоры Абдуает Заитұлы Айтқожаев жүргізді.
Семинардың басты мақсаты — заманауи білім беру технологияларын зерделеу, оқу үдерісінің тиімділігін арттыру және техникалық бағыттағы болашақ мамандардың кәсіби құзыреттіліктерін дамыту. Жиын барысында оқытудың өзекті инновациялық әдістері, цифрлық білім беру платформаларын қолдану, жасанды интеллект мүмкіндіктерін пайдалану, интерактивті сабақтар ұйымдастыру және оқу үдерісіне виртуалды зертханаларды енгізу мәселелері жан-жақты қарастырылды.
Абдуает Заитұлы техникалық пәндерді оқытуда теориялық білім мен практикалық дағдыларды ұштастырудың айрықша маңыздылығын атап өтті. Оның айтуынша, оқытудың озық әдістері студенттердің танымдық белсенділігін арттырып, сыни ойлау қабілетін, шығармашылық әлеуетін, аналитикалық дағдыларын және өз бетінше шешім қабылдау дербестігін дамытуға ықпал етеді. Сонымен қатар компьютерлік модельдеуге, зертханалық зерттеулерді цифрландыруға және ғылыми-зерттеу жобаларын білім беру қызметіне кіріктіруге ерекше назар аударылды. Мұндай тәсілдер студенттерге іргелі білімді меңгеріп қана қоймай, оны өзекті инженерлік және технологиялық міндеттерді шешуде тиімді қолдануға мүмкіндік береді.
Семинардың жеке бір бағыты ретінде инновациялық білім берудің БҰҰ-ның Тұрақты даму мақсаттарымен (ТДМ) өзара байланысы талқыланды. Атап айтқанда, білім сапасын арттыруға бағытталған ТДМ 4 (Сапалы білім беру), ғылыми-техникалық прогресс пен заманауи инфрақұрылымды дамытуды көздейтін ТДМ 9 (Индустрияландыру, инновациялар және инфрақұрылым), сондай-ақ виртуалды зертханалар мен цифрлық модельдеу арқылы ресурстарды ұтымды пайдалануға мүмкіндік беретін ТДМ 12 (Жауапты тұтыну және өндіріс) мақсаттары ерекше аталды.
Іс-шара соңында инновациялық білім беру тәсілдерін дамыту — заманауи еңбек нарығының талаптарына бейімделе алатын және ірі ғылыми-техникалық жобаларды жүзеге асыруға қабілетті бәсекеге қабілетті мамандар даярлаудың басты шарты екені түйінделді. Осындай семинарларды өткізу жоғары білім беру жүйесін жетілдіруге, университеттің ғылыми әлеуетін нығайтуға және болашақ инженерлерді даярлауға озық технологияларды енгізуге зор үлес қосады.
Басқа жаңалықтар