Қосдипломды Механика және Энергетика білім беру бағдарламасы

Менің есімім – Жансая Айтхожа, мен Әл-Фараби атындағы Қазақ ұлттық университетінің "Механика және энергетика" білім беру бағдарламасының екінші курс магистрантымын. Бұл бағдарлама маған терең теориялық біліммен қатар, халықаралық тәжірибе мен жаңа мүмкіндіктерге жол ашты. Магистратураның екінші жылын Францияның Нанси қаласындағы Лотарингия университетінде өткіздім, бұл мен үшін өмірлік маңызды тәжірибе болды.

Бакалавриатты аяқтағаннан кейін, мен халықаралық деңгейде тәжірибе жинап, практика жүзінде білім алуға мүмкіндік беретін бағдарламаны іздедім. Механика және энергетика бағдарламасымен ғылыми жетекшім таныстырып, оның артықшылықтарын зерттеген соң, бұл менің болашағым үшін ең жақсы жол екеніне сенімді болдым. Бірінші жылы ҚазҰУ-да оқып, екінші жылды Лотарингия университетінде жалғастыру үшін дайындалдым. Абай Верн шәкіртақысын жеңіп алып, ай сайын 800 еуро көлемінде қаржылай қолдау алдым, бұл сома Франциядағы барлық шығындарды жабуға мүмкіндік берді, сондықтан мен білім алуға толығымен көңіл бөлдім.

Лотарингия университеті студенттерге қолайлы шағын қала Нансида орналасқан. Мұнда Reservoir Engineering бағыты бойынша білім алдым. Бізге Францияның ірі энергетикалық компанияларының мамандары келіп, тәжірибелерімен бөлісіп, тағылымдамадан өтуге шақырды, бұл мен үшін үлкен мүмкіндік болды.

Алғашқы семестрден кейін Бордо қаласындағы I2M зертханасында тағылымдамадан өттім. Шетелдік профессорлармен жұмыс істеу менің кәсіби білімімді тереңдетіп, жеке тұлға ретінде де дамуыма ықпал етті. Францияда оқып, жаңа оқыту әдістерін меңгеріп, білім мен ғылымдағы жаңа мүмкіндіктерге көзімді аштым. Шетелде оқу бастапқыда қиындық туғызғанымен, уақыт өте келе бәрі қалыпқа келді. Мен халықаралық мәдениетпен танысып, жаңа достар таптым және Еуропаның бірнеше елдеріне саяхат жасау мүмкіндігіне ие болдым, бұл әлемнің қаншалықты кең екенін көрсетті.

Механика және энергетика қосдипломды бағдарламасы Қазақстанда және шетелде көптеген мүмкіндіктерді ашады. Халықаралық деңгейде тәжірибе жинап, еліміздің энергетика саласын дамытуға үлес қосуға ниеттімін. Энергетика секторы бүгінде әлемде өте маңызды болып табылады, және осы бағдарлама маған осындай мүмкіндіктер береді. Сондықтан мен оны таңдауға кеңес беремін.

Жансая Айтхожа

Механика кафедрасының магистранты