ҚазҰУ-де CITech–2024 халықаралық конференциясы өтті.

2024 жылдың 23-24 қазан күндері әл-Фараби атындағы Қазақ ұлттық университетінде ҚазҰУ-дың 90 жылдығына және көрнекті математик-ғалым, ҚР ҰҒА академигі Шалтай Смағұловтың 75 жылдығына арналған “Computational and Information Technologies in Science, Engineering and Education” (CITech–2024) халықаралық ғылыми конференциясы өтті.

Конференцияда жақын және алыс шетелден келген қатысушылардың 100-ден астам баяндамасы ұсынылды. Негізгі баяндамалар қазіргі заманғы математикалық, механикалық мәселелерді шешу әдістеріне, есептеу математикасына, математикалық модельдеуге, заманауи технологияларға, инженериядағы инновациялық шешімдерге және цифрлық трансформацияға арналды.

«Математикалық және компьютерлік модельдеу» секциясында биомедицина, экономика (ТДМ 8 – экономикалық өсу), экология (ТДМ 6 және 15), жылу мен масса алмасуы, деформацияланатын қатты дене және т.б. тақырыптардағы әртүрлі үрдістерді математикалық модельдеу бойынша 29 баяндама тыңдалды. Барлық баяндамалар бойынша қатысушылардың сөз сөйлеулері, талқылаулар және пікір алмасулар ұйымдастырылды. Шетелдік қатысушылар үшін баяндамалар офлайн және онлайн форматта өтті (ТДМ 17 – тұрақты даму мақсатындағы серіктестік).

Іс-шара академик Ш. Смағұловтың әлемдік ғылымға қосқан үлесін және университеттің аймақтың жетекші ғылыми-білім беру орталығы ретіндегі рөлін айқындаған маңызды білім мен тәжірибе алмасу алаңына айналды. Механика-математика факультеті осы іс-шараны ұйымдастыруға қолдау көрсеткен Ұлттық Инженерлік академияға алғыс білдіреді.