Әл-Фараби атындағы ҚазҰУ-дің заң факультетінің студенттік заң клиникасы мен Қазақстан Республикасы банк омбудсмені арасындағы азаматтарға құқықтық кеңес беру саласындағы ынтымақтастық

2025 жылдың 7 ақпанында ТДМ-16 аясында құқықтық институттарды нығайту және азаматтарға қолжетімді құқықтық көмек көрсету мақсатында  әл-Фараби атындағы ҚазҰУ-дің заң факультетінің Cтуденттік заң клиникасының өкілдері мен Қазақстан Республикасы банк омбудсмені  Д.Нұрпейісов арасында маңызды кездесу өтті. 
Бұл кездесудің мақсаты - азаматтардың құқықтық сауаттылығын арттыру және оларға құқықтық қызметтерді сапалы әрі қолжетімді түрде көрсету. Кездесу барысында Қазақстан Республикасы банк омбудсмені  Д.Нұрпейісов омбудсменнің қызметі мен оның қаржы, банк саласындағы  маңыздылығын таныстырып өтті. Ол банк омбудсменінің кеңсесіне  ай сайын шамамен 2000 өтініштер келіп түсетіндігін атап, бұл банк саласындағы халықтың құқықтық көмекке деген қажеттілігінің жоғары екенін көрсетті. Сонымен қатар, Д.Нұрпейісов азаматтардың құқықтық мәселелерін шешуге бағытталған жүйелі жұмыс жүргізу қажеттілігіне назар аударды.
Әл-Фараби атындағы ҚазҰУ-дің заң факультетінің кеден, қаржы және экологиялық құқық кафедрасының  профессоры      Д. Байдельдинов өз кезегінде Қазақстан Республикасы банк омбудсмені  Д.Нұрпейісовке осы кездесуді ұйымдастырғаны үшін алғысын білдірді. Ол Студенттік заң клиникасының азаматтарға құқықтық кеңес беру саласындағы одан әрі ынтымақтастыққа дайындығын, сондай-ақ өзекті құқықтық мәселелер бойынша ғылыми зерттеулер жүргізу мүмкіндігін атап өтті.