ФАКУЛЬТЕТТІҢ ШЕТЕЛДІК СТУДЕНТТЕРІМЕН КЕЗДЕСУ ӨТТІ
2025 жылдың 05 наурыз күні Шығыстану факультеті Халықаралық бренд-маркетинг және рекрутинг кеңсесімен бірлесіп «Қолдау және көші-қон мәселелері» тақырыбында шетелдік студенттерге арналған онлайн ақпараттық кездесу өткізді.
Бұл кездесудің мақсаты - студенттердің Қазақстанның оқу және мәдени ортасына табысты бейімделуіне жәрдемдесу, сондай-ақ көші-қон режимінің ережелерін түсіндіру.
Халықаралық бренд-маркетинг және рекрутинг кеңсесінің басшысы, PhD Ж.М. Тусубаева қатысушыларға университеттің ішкі тәртіп ережелері, оқу процесінің ерекшеліктері және шетелдік студенттерге қолжетімді қолдау шаралары туралы айтып берді. Кездесуде көші-қон заңнамасын сақтау мәселелеріне ерекше назар аударылды. Кеңсе басшысы, PhD Ж.М. Тусубаева шетелдік азаматтардың Қазақстанда болудың ережелері, тұрғылықты жері бойынша тіркеу, визаларды рәсімдеу туралы ақпараттарды айтып берді, сондай-ақ көші-қон режимін бұзуға жол бермеу туралы еске салды. Ол шетелдік студенттерге университет басшылығының туындаған мәселелерді шешуге көмектесуге дайын екендігін атап өтіп, факультетпен үнемі тығыз қарым-қатынаста болу маңыздылығына назар аударды.
Қазіргі таңда факультетте Тәжікстан, Өзбекстан, Қытай, Ресей, Украина, Моңғолия және Бангладештен келген шетелдік студенттер оқиды. Мұндай кездесулерді өткізу шетелдік студенттердің жаңалықтармен хабардар болуына және олардың Қазақстанда оқуы мен тұруы үшін қолайлы жағдайлар жасауда маңызды рөл атқарады.
