ҚАЗҰУ ҒАЛЫМЫ «СИНЬХУА» АГЕНТТІГІНЕ ЭКСКЛЮЗИВТІ СҰХБАТ БЕРДІ
2025 жылдың 30 қыркүйегінде әл-Фараби атындағы Қазақ ұлттық университетінің қытайтану кафедрасының қауымдастырылған профессоры Фатимабибі Даулет әлемдегі ең ірі ақпараттық агенттіктердің бірі – «Синьхуа» агенттігіне эксклюзивті сұхбат берді. Әңгіме барысында профессор соңғы онжылдықтардағы Қытайдың әлеуметтік-экономикалық дамудағы жетістіктеріне, сондай-ақ «Бір белдеу – бір жол» бастамасына және жаһандық басқару тұжырымдамасына және аталмыш жобалар аумағындағы Қытайдың орнына сараптамалық баға берді. Оның айтуынша, Қазақстан мен ҚазҰУ-дың бұл ірі өзгерістерге қатысуы – тек қана мүмкіндік емес, сонымен бірге өңірлік дамуды халықаралық ынтымақтастықпен ұштастыратын және тұрақты болашаққа жол ашатын бірден-бір жол. Фатимабибі Даулет халықаралық ынтымастық жолындағы ҚазҰУ-дың рөліне ерекше тоқталып өтті. Мысалы, университетімізде Сиань қаласындағы Солтүстік-Батыс политехникалық университетінің филиалы ашылды, «Жерді қашықтан зондтау технологиялары және оны қолдану» атты Қазақстан-Қытай бірлескен зертханасы жұмыс істейді, сондай-ақ Орталық Азиядағы тұрақты даму орталығы бар. Бұл орталықтың қызметі аймақтағы және «Бір белдеу – бір жол» бастамасына қатысушы елдердегі өзекті әлеуметтік мәселелерді шешуге бағытталған. Сұхбатта, сонымен бірге, бүгінгі таңда ҚазҰУ халықаралық форумдар мен конференцияларға, академиялық желілерге белсене қатысып, Қытайдың 65-тен астам жетекші университеттерімен серіктестік орнатқаны атап көрсетілді. «Синьхуа» – әлемдегі жетекші БАҚ-тың бірі, Қытайдың ең ірі әрі беделді ақпарат агенттігі болып саналады. Оның материалдары оннан астам тілде жарық көріп, бірнеше жүз миллион оқырманы бар. Фатимабибі Даулет – Қазақстанның жетекші қытайтанушысы, ҚазҰУ-дың шығыстану факультетінің түлегі, отандық тәуелсіз қытайтанудың негізін қалаушылардың бірі. Ол халықаралық симпозиумдарға, конференцияларға ең жиі қатысатын, бүгінде Орталық Азиядағы қытайтану саласында ҚХР БАҚ-тарына ең көп сұхбат беретін және сарапшылық пікірі ең көп сұранысқа ие зерттеушілердің қатарында. Тек соңғы жылдың өзінде Қытайдың жетекші БАҚ-тары – «Жэньминь жибао», China News және «Синьхуа» агенттігі алаңдарында Фатимабибі Дәулет жайлы мақалалар мен сұхбаттар жарық көрді. Аталмыш алаңдарды профессор отандық академиялық қауымдастықты ілгерілету, әл-Фараби атындағы ҚазҰУ және қазақстандық қытайтануды халықаралық деңгейде таныту үшін белсенді пайдалануда.
Басқа жаңалықтар
