ТДМ №3, 4, 10: Қоғамдық бірлестік пен университет арасында жолдастық кездесу өтті

11 қазан күні Алматы қаласында «Қазақстан зағиптар қоғамы» қоғамдық бірлестігінің филиалы мен әл-Фараби атындағы Қазақ ұлттық университетінің Инклюзия орталығының қатысуымен бірлескен инклюзивті спорттық-мәдени іс-шара өтті.

Іс-шараның басты мақсаты – мүмкіндігі шектеулі жандардың қоғамға әлеуметтік интеграциясына ықпал ету, инклюзивті мәдениетті дамыту және қоғам назарын қолжетімділік пен тең мүмкіндік мәселелеріне аудару болды. Бағдарлама аясында ұлттық зияткерлік ойын – тоғызқұмалақтан, сондай-ақ шахмат пен дойбыдан достық кездесулер өтті.

Іс-шараға ерекше қолдау мен бірлік атмосферасын әл-Фараби атындағы ҚазҰУ студенттері қалыптастырды. Олар тек ойындарға қатысып қана қоймай, ерекше жандармен белсенді қарым-қатынас орнатты, өзара құрмет пен жанашырлықтың жоғары деңгейін көрсетті. Сонымен қатар, іс-шара аясында студенттер мен көру қабілеті шектеулі қатысушылар дайындаған концерттік бағдарлама ұйымдастырылды.

Мұндай іс-шаралар инклюзивті қоғамды дамытуға ғана емес, сонымен қатар әр адам өзін қажет әрі маңызды сезінетін ашық және төзімді қоғам қалыптастыру жолындағы маңызды қадам болып табылады. Қатысушылардың айтуынша, бұл кездесулер тек зияткерлік қабілет пен спорттық рухты дамытып қана қоймай, сонымен бірге қарым-қатынас, өзара түсіністік пен тұлғалық өсу үшін жаңа мүмкіндіктер ашады. Көпшілік үшін бұл инклюзивті форматтағы алғашқы тәжірибе болды, ол өмірлік тәжірибесі әртүрлі адамдар арасында жылы әрі сенімді байланыстар орнатуға, қалыптасқан стереотиптерді бұзуға мүмкіндік берді.