«Синьхуа» акпараттық агенттігі қытайтанушы ғалым Фатимабибі Дәулетпен мәдениеттер келіссөзі аясындағы ғылым және білім беру мәселелері жайлы эксклюзив сұхбат жариялады

12 қазан күні «Синьхуа» ақпарат агенттігі еліміздің белгілі қытайтанушы ғалымы, қытайтану кафедрасының қауымдастырылған профессоры Фатимабиі Ноғайқызы Даулетпен эксклюзивті бейнесұхбат жариялады. Сұхбат барысында профессор өзінің өмірлік және кәсіби жолымен бөлісіп, қытай тілі мен мәдениетіне деген қызығушылығы жас кезінен басталғанын атап өтті. Бұл қызығушылыққа танымал қытай жазушы классиктері Лу Синь мен Лао Шэ шығармалары, сондай-ақ еңбекті, білім мен мәдениетаралық келісімді жоғары бағалайтын отбасылық дәстүр әсер еткенін айтты. Профессор Дәулет әрбір ұстаздың басты миссиясы – ол білім арқылы тұлға қалыптастыру екенін ерекше атап өтті. Ұстаздың айтуынша, білім мен ғылымның түпкі мақсаты – қоғамға пайдалы, саналы азамат даярлау болып табылады. Ғалым, сонымен бірге, өзінің ғылым мен отбасы өмірін үйлестіру тәжірибесі, әйелдердің ғылымдағы орны және қазіргі заманда жас әйел ғалымдар үшін академиялық және кәсіби салада өз әлеуетін жүзеге асыру үшін жасалып жатқан мүмкіндіктері жайында ой бөлісті. Сұхбатта Фатимабибі Дәулет мәдениетаралық аударма мәселелеріне байланысты өз кәсіби ойымен бөлісті. Ғалымның айтуынша, оның асқақ арманы – жоғары білікті аудармашылардың жаңа буынын тәрбиелеу. Нағыз аудармашы тек сөзді бір тілден екінші тілге аударып қана қоймай, мақсатты тілде әртүрлі мәдениеттердің мән-мағыналарын жеткізе білуі тиіс. Ол тілдік дәлдікке ғана емес, аударманың мәдени контекстін терең түсінуге де назар аударатын маман болуы қажет. Ғалымның пікірінше, сапалы аударма – жай ғана зияткерлік өнім емес, әртүрлі мәдениеттерді өзара түсінікті ететін маңызды миссия Сұхбаттың соңында профессор әлемнің түкпір-түкпіріндегі студент қыздарға төмендегідей жолдарды арнады: «Қиындықтардан қорықпаңыздар, өмір сынақтарын шыңдалу мүмкіндігі деп, ал білімді асқақ армандардың шыңына жеткізер қанат деп қабылдаңыздар». «Синьхуа» ақпарат агенттігі жариялаған бұл сұхбат Фатимабибі Ноғайқызы Даулеттің академиялық жолын, ғалым әрі ұстаз ретіндегі кәсіби біліктілігі мен адами келбетін айқындайтын, еліміздің түрлі салаларында табысты еңбек етіп жүрген қытайтанушылардың бірнеше буынын тәрбиелеп шығарған әлемге танымал маман екенін айқын көрсететін маңызды материал болып табылады.

Интервью