Әл-Фараби атындағы ҚазҰУ-де экологиялық мәдениетті дамыту мақсатында сенбілік өтті

2025 жылғы 20 қыркүйекте Әл-Фараби атындағы Қазақ ұлттық университетінің кампусында БҰҰ-ның Тұрақты даму мақсаттарының (ТДМ) үш бағыты мен «Таза Қазақстан» (2024–2029) экологиялық мәдениетті дамыту жоспары аясында сенбілік ұйымдастырылды.

Іс-шараның негізгі мақсаты – табиғатты аялау, экологиялық мәдениетті арттыру және қоршаған ортаның тазалығын сақтау маңыздылығын насихаттау болды. Сенбілікке факультет оқытушылары мен студенттері белсене қатысып, өздеріне бекітілген аумақтарды тазалау жұмыстарын жүргізді.

Мұндай экологиялық бастамалар қоғамда экологиялық мәдениетті нығайтуға және жастардың табиғатқа деген жауапкершілігін арттыруға ықпал етеді. Механика-математика факультетінің студенттері мен оқытушыларының сенбілікке белсене қатысуы БҰҰ-ның Тұрақты даму мақсаттарының (ТДМ) бірнешеуіне сәйкес келеді. ТДМ 11: Тұрақты қалалар мен елді мекендер – университет аумағын және қоғамдық кеңістіктерді таза ұстау арқылы студенттер өз қаласының экологиялық тұрақтылығына үлес қосты. ТДМ 13: Климаттың өзгеруімен күрес – қоршаған ортаны қорғау және экологиялық мәдениетті дамыту арқылы климаттық өзгерістердің әсерін азайтуға бағытталған қадам жасалды. ТДМ 15: Құрлықтағы экожүйелерді қорғау – табиғатты аялау, жасыл аймақтарды тазарту және экожүйелердің тепе-теңдігін сақтау ісіне үлес қосылды.

Сенбілікке қатысқан жастар мен оқытушылар табиғатты қорғау – әрбір азаматтың парызы екенін түсініп, өз ісімен үлгі көрсетті. Мұндай бастамалар университет ұжымының жауапкершілігін арттырып қана қоймай, экологиялық сананы қалыптастыруға да зор мүмкіндік береді.

Факультет деканаты