Шетелдік ғалымдардың Ботаникалық баққа сапары

«Орталық Азияның биоалуантүрлілігін сақтау мәселелері мен перспективалары» атты халықаралық ғылыми-тәжірибелік конференция аясында Әзербайжан, Қырғызстан, Тәжікстан, Өзбекстан және Ресейден келген шетелдік ғалымдар мен серіктестер Алматы қаласындағы Ботаникалық баққа барды.

Бұл іс-шара конференцияның мәдени-білім беру бағдарламасының бір бөлігі болып, биоалуантүрлілікті сақтау, ботаникалық зерттеулер мен экотуризмді дамыту салаларында тәжірибе алмасуға бағытталды.

Сапар барысында ботаникалық бақ қызметкерлері флоралық алуандықты сақтау, экологиялық білім беру және ботаникалық бақтардың тұрақты даму қағидаттарын жүзеге асырудағы рөлі тақырыбында баяндамалар жасады:

1. П.В. Веселова — «Бетпақдала шөлінің солтүстік-шығыс бөлігіндегі сирек түрлер мен олардың шоғырлану орындарын анықтау» (Қазақстан);
2. Б.К. Коспенбетова — «Биоалуантүрлілікті сақтау үшін ботаникалық бақтағы экологиялық білім беру» (Қазақстан);
3. Т.Ш. Мурзатаева — «Биоалуантүрлілікті сақтауда тұқым банкісінің үлесі» (Қазақстан);
4. Л.Д. Димеева — «Алматы облысы флорасының қазіргі экологиялық жағдайына кадастрлық баға беру» (Қазақстан).

Қатысушылар сирек және эндемикалық өсімдіктер коллекцияларымен, жасыл екпелерді қалпына келтіру және өсімдік генофондын сақтау жобаларымен танысты.

Ерекше назар ботаникалық бақтардың ғылыми және білім беру орталықтары ретіндегі рөліне аударылды. Олар Тұрақты даму мақсаттарын (ТДМ) жүзеге асыруға үлес қосуда: ТДМ 4 – «Сапалы білім беру», ТДМ 13 – «Климаттың өзгеруіне қарсы күрес», ТДМ 15 – «Құрлық экожүйелерін және биоалуантүрлілікті сақтау», ТДМ 17 – «Тұрақты даму мүддесіндегі әріптестік».

Ботаникалық баққа бару табиғатты қорғау және тұрақты даму саласында Орталық Азия елдерінің ынтымақтастығын нығайту мен халықаралық білім алмасудың маңызды алаңына айналды.