Eternal You: Жасанды интеллект және адамдықтың шекаралары

2025 жылдың 3 қазанында механика-математика факультетінде «Eternal You» (2024) деректі фильмінің көрсетілімі және талқылауы өтті. Іс-шара AI Week аясында ұйымдастырылды, ол жасанды интеллекттің қазіргі даму бағыттары мен оның қоғам өміріндегі рөліне арналған кездесулер мен пікірталастар сериясын қамтиды. Іс-шараны механика-математика факультетінің ғылыми-инновациялық қызмет және халықаралық байланыстар жөніндегі деканның орынбасары Сабирова Роза Фархатовна және оқу-әдістемелік және тәрбие жұмысы жөніндегі деканның орынбасары Сахаева Айгерим Куандыковна ұйымдастырды.

Фильм «цифрлық мәңгілік» ұғымын қозғайды — яғни адамның өмірден өткеннен кейін оның дауысы, қарым-қатынас стилі және мінез-құлық ерекшеліктерін хат алмасулар, фотосуреттер мен аудиожазбалар сияқты деректер негізінде қайта жасайтын технологияларды. Талқылау барысында студенттер мен оқытушылар мұндай технологиялардың жақын адамынан айырылу процесіне және оларды еске алу тәжірибесіне қалай әсер етуі мүмкін екендігін сөз етті. Сонымен қатар, этика мен жауапкершілік мәселелері қарастырылды: адамға тиесілі цифрлық мұраны кім басқаруы тиіс, эмоционалдық манипуляцияларды болдырмаудың жолдары қандай, сондай-ақ психологиялық қолдау мен алгоритмдер арқылы жасалған жасанды тәжірибенің арасындағы шекара қай жерде жатқандығы талқыланды.

Сондай-ақ жасанды интеллекттің жедел дамуы жағдайында қоғамның, білім беру институттарының және мемлекеттік құрылымдардың рөлін айқындау мәселелері көтерілді. Пікірталас жасанды интеллект адамның тұлғасын, жадын және адамдар арасындағы өзара әрекеттесуді түсінуге әсер ететін жаңа мәдени және әлеуметтік тәжірибелер қалыптастыратынын және бұл үдеріске адамгершілікпен әрі ұқыпты қарау қажеттігін көрсетті.

Іс-шара Тұрақты даму мақсаттарын (ТДМ) ілгерілетуге бағытталды. Атап айтқанда, ТДМ 4 «Сапалы білім» студенттердің цифрлық және этикалық сауаттылығын дамыту арқылы көрініс тапты. ТДМ 9 «Индустрияландыру, инновациялар және инфрақұрылым» жасанды интеллект саласындағы инновациялық шешімдердің маңызы жөніндегі түсінікті кеңейтумен байланысты болды. ТДМ 16 «Бейбітшілік, әділет және мықты институттар» жасанды интеллектті жауапты және адам қадірін құрметтейтін негізде реттеу қажеттілігі туралы талқылауларда көрініс тапты.

Роза Сабирова
Ғылыми-инновациялық қызмет және халықаралық байланыстар жөніндегі деканның орынбасары,
Математикалық және компьютерлік модельдеу кафедрасының аға оқытушысы