Әл-Фараби атындағы ҚазҰУ-де Әйелдер мен қыздардың ғылымдағы халықаралық күні аталып өтті: цифрлық технологиялар мен VR-білім беруге басымдық

2026 жылғы 11 ақпанда Әл-Фараби атындағы Қазақ ұлттық университетінің кітапханасында Әйелдер мен қыздардың ғылымдағы халықаралық күніне арналған іс-шара өтті. Іс-шараның бастамашысы – Алматы қаласындағы ЮНЕСКО-ның өңірлік кеңсесі.

Іс-шара ғылым мен технологияны дамытудағы әйелдердің рөлін, сондай-ақ заманауи білім беру құралдарын талқылау мақсатында академиялық қауымдастық өкілдерін, халықаралық ұйымдарды және жас зерттеуші қыздарды біріктірді.

Іс-шара барысында Орталық Азия криосферасы бойынша ҒЭҚ–БҰҰДБ–ЮНЕСКО жобасы аясында әзірленген «Мұздықтардың өмір сызықтары» виртуалды шынайылық жабдығын табыстау рәсіміне ерекше назар аударылды. VR-жабдықтар оқу үдерісіне енгізу үшін География және табиғатты пайдалану факультетіне берілді.

VR-бағдарлама төрт интерактивті модульден тұрады:

- Ирригация

- Су энергетикасы

- Мұздықтарды мониторингтеу

- Апаттар қаупін азайту

Бұл технология студенттерге мұздықтардың қалыптасуы мен деградация үдерістеріне «терең енуге», климаттың өзгеруінің Орталық Азиядағы су ресурстарына әсерін көруге және криосфера мен өңірдің әлеуметтік-экономикалық дамуы арасындағы байланысты түсінуге мүмкіндік береді.

Білім беру үдерісінде виртуалды шынайылықты қолдану:

1) Күрделі табиғи үдерістерге терең бойлауды қамтамасыз етеді – студенттер мұздық динамикасы мен климаттық өзгерістер туралы нақты әрі көрнекі түсінік алады.

2) Мотивация мен қызығушылықты арттырады – интерактивті оқыту форматы ғылыми пәндерге деген қызығушылықты, әсіресе қыздар мен жас зерттеушілер арасында күшейтеді.

3) Тәжірибеге бағытталған дағдыларды дамытады – VR технологиясы биік таулы аймақтарға шықпай-ақ мониторинг, тәуекелдерді бағалау және су ресурстарын басқару сценарийлерін модельдеуге мүмкіндік береді.

4) Цифрлық құзыреттерді қалыптастырады – заманауи технологияларды пайдалану география, климатология және орнықты даму салаларында жаңа буын мамандарын даярлау талаптарына сәйкес келеді.

VR-шешімдерді оқу үдерісіне енгізу ҚазҰУ-дың климаттың өзгеруі, су ресурстары және орнықты даму саласында мамандар даярлауда заманауи цифрлық құралдарды енгізетін өңірдегі жетекші ғылыми-білім беру орталығы ретіндегі позициясын нығайтады.

Іс-шара гендерлік теңдік, халықаралық әріптестік және инновациялық технологиялардың үйлесуі XXI ғасырдағы университеттік білім берудің жаңа моделін қалыптастыратынын көрсетті.

Жоба БҰҰ-ның 4-ші Тұрақты даму мақсаты – «Сапалы білім беруге» қол жеткізуге ықпал етеді, заманауи цифрлық білім беру технологияларына қолжетімділікті қамтамасыз етеді, сондай-ақ университет пен халықаралық ұйымдар арасындағы тиімді ынтымақтастық арқылы 17-ші ТДМ – «Орнықты даму жолындағы әріптестік» мақсатын нығайтады.