2025 жылдың 24 ақпанында 6B01701 – Қазақ тілі мен әдебиеті мамандығының 4-курс студенті Мендеш Айнұр Днибекқызы «JOO High School Almaty» мектебінде өтіп жатқан оқу тәжірибесі аясында 11-сынып оқушыларына оқу сауаттылығы пәнінен «Ұлттық аспаптар» тақырыбында ашық сабақ өткізді.
Ашық сабақ ТДМ 4: «Сапалы білім беру» мақсаттарын жүзеге асыру аясында ұйымдастырылып, білімнің қолжетімділігін қамтамасыз ету және заманауи технологияларды тиімді пайдалану арқылы оқытудың сапасын арттыруға бағытталды. Сабақтың мақсаты – мәтін бойынша негізгі және қосымша ақпараттарды анықтау дағдыларын дамыту. Сабақ оқушылардың бір-біріне «Жылы сөз – жанға қуат» атты психологиялық ахуал сыйлауымен басталды. Кейін оқушылар «Қазақы өрнек ішіндегі құпия» әдісі арқылы қағаздағы QR-кодтарды пайдаланып, үш топқа бөлінді. Негізгі бөлімде оқушылар ұлттық аспаптар туралы бейнеролик көріп, олардың дыбысына қарай аспаптарды анықтады.
Ары қарай «Домбыра – қазақтың қасиетті мұрасы», «Қобыз – қазақтың киелі аспабы», «Жетіген – ұлы дала мұрасы» атты мәтіндермен танысып, «Mind map» әдісі арқылы ұлттық аспаптардың ерекшеліктерін менталды картада жүйеледі. Сонымен қатар, оқушылар «Wordwall» платформасы негізінде ұлттық аспаптарға қатысты мәтіндерді қаншалықты меңгергенін тексеру мақсатында тест тапсырды. Сабақтың соңында оқушылар «Padlet» платформасы арқылы кері байланыс беріп, өз ойларымен бөлісті. Бұл ашық сабақ заманауи әдістер мен технологияларды қолдану арқылы оқушылардың шығармашылық және аналитикалық қабілеттерін дамытуға ықпал етті. ТДМ 4 аясында ұйымдастырылған бұл сабақ оқушылардың оқу сауаттылығын арттырумен қатар, ұлттық мәдениетке деген қызығушылығын оятуға бағытталды.
Шортанбай Шохан, қазақ әдебиеті және әдебиет теориясы кафедрасының аға оқытушысы, практика жетекшісі
